政Whats噏:中聯辦冇幹預港大 李國章斥《南早》假新聞 

作者:Frances    發表日期:2018-01-11 06:36:10

香港大學校長馬斐森將於本月底就會執包袱離任,準備去蘇格蘭愛丁堡大學做校長,臨別依依,他早前接受《南華早報》訪問時透露,任內經常受到中聯辦幹預。港大校委會主席李國章今日(10日)直斥《南早》有關報道「係假新聞」,又引述馬斐森指被《南早》錯誤引述其言論。

李國章今日接受立法會前議員劉慧卿訪問,當卿姐提及《南早》有關馬斐森的訪問時,李國章即刻話「係假新聞」,他從未聽過馬斐森受到壓力或中聯辦幹預,所以他睇完報道都嚇一跳,於是就此事向馬斐森了解。李引述馬斐森指自己是在訪問中被問及是否經常在壓力下工作,馬就回答是經常,馬又被問及是否曾接獲中聯辦的意見,但《南早》把兩者混為一談。

李國章否認港大受到中聯辦幹預,無奈指「溝通就話係幹預,唔溝通又話唔溝通」,他不會視意見為幹預,中聯辦教你點做才是幹預。

對於馬斐森爆大鑊話做到第4年,李國章都唔同佢傾續約先要走。李國章話,馬斐森係2014年4月上任,任期至2019年4月,即是到今個月都未夠4年,而馬斐森喺2016年搵過佢話想續多5年約,嗰陣就講明起碼做夠3年半到4年先傾喇,點知幾個月後馬就話接受咗愛丁堡份聘約。佢仲話,如果對自己有信心係做得好,其實好難炒校長,無人打算炒人,隻係跟規矩做夠年期先開始傾。

至於點評價馬斐森,李國章就話佢做嘢唔夠仔細,但唔係話佢差,馬斐森喺好多地方上都做咗好多功夫,無人係十全十美嘅。

李國章又提起,當年校委會否決港大前法律學院院長陳文敏做副校長,直言馬斐森都認無睇過陳嘅履歷,「你攞佢(陳文敏)同依家做緊嗰位教授嘅CV出嚟秤嚇,睇嚇高低,睇嚇斤両點樣」,重申校委會唔係橡皮圖章,如果夠斤両升級唔係問題。李國章又話,請教授唔係一件大事,唔係有政黨支持就可以升級,要睇一個教授喺學術有無貢獻。

問到港大學生會缺莊,李國章話有學生反映之前學生會嘅立場代表唔到佢哋,叫學生會反省下點解無人上莊,又話學生會係維護學生利益,唔係搞政治,亦唔係用暴力,佢都覺得缺莊好可惜。


本文來源:http://hk.on.cc/hk/bkn/cnt/news/20180110/bkn-20180110175123630-0110_00822_001.html

本文固定鏈接: http://www.motocyclebike.com/65113.html
轉載請注明:Frances 2018-01-11 06:36:10 于 MOCO時尚資訊 發表

上一篇: :下一篇
返回頂部