世盃外 紅顏禍水?智利迷搞遊行逼A山撇女

作者:ohn    發表日期:2017-09-07 19:37:02

即上英超刨績王:http://win.on.cc/epl 

邊個話拍拖係兩個人嘅事?就好似智利首席球星阿歷斯山齊士(A山),原來佢拍拖,竟然係舉國上下嘅事,尤其家陣智利喺世盃外南美洲區陷於出局邊緣,智利球迷諗到最好嘅「救國」方法,唔係點樣練好班波,又唔係點樣培育新血,而係叫A山即刻飛咗佢女友,收身減肥,再專心踢波,認為咁就可以出線出年俄羅斯世盃決賽周咁話,問你服未!

咪以為係講笑,查實依家已經有智利球迷喺社交網搞緊個遊行抗議活動,以「逼A山同女友美迪分手,以重返最佳狀態爭取打入世界盃大遊行」為名,定咗下個月5號,就喺智利嘅國家球場附近集行遊行,向A山施壓,據聞個活動已經有多達9,000人表示有興趣,當然最終有幾多人堅肯企出嚟就冇人知啦!

事實上,A山喺近呢幾個月表現真係有多少跌Watt,唔少球迷都認定,係因為A山今年出識咗新明星女友美迪洛迪古絲所致。就連前智利U20領隊蘇蘭泰都話A山肥咗:「我一睇就知,佢身型走晒樣啦,明顯係肥過正常。智利冇咗佢嘅火花,即刻突破唔到巴拉圭防線,呢個唔係我認識嘅A山囉!」

其實A山近排都有喺社交網公開發牢騷,話身邊好多人有理冇理都好,都係將矛頭指向晒佢,無論咩都係佢錯,A山話覺得好辛苦同好攰喎。又難怪A山多怨言,踢得唔好,竟然畀人逼佢同女友分手,唔通愛情同事業,真係二者只可揀其一?


東網體育同你追實體壇每個精彩時刻! 
http://bit.ly/2ecTF2A 


本文来源:http://hk.on.cc/hk/bkn/cnt/sport/20170907/bkn-20170907172720369-0907_00882_001.html

本文固定鏈接: http://www.motocyclebike.com/25793.html
轉載請注明:ohn 2017-09-07 19:37:02 于 MOCO時尚資訊 發表

上一篇: :下一篇
返回頂部