【NBA經典】星級旅行團 吔包歎茶被抄牌

作者:Daisy    發表日期:2017-08-08 01:02:10

NBA經典球星玩轉香港!昨日前塞爾特人名將皮雅斯,帶埋史達候斯、馬利安、候斯頓、巴朗戴維斯、慈世平,組成「星級旅行團」在港遊覽,期間眾星上山下海,歎美食睇靚景,仲要「被抄牌」,玩得堅開心!至於另一位前「綠軍」加納特,就選擇獨自坐天星小輪,喺另一個角度感受香港。

雖然咁多位NBA球星周日晚先到港,但昨日一大早已出動玩餐飽,曾效力塞爾特人的皮雅斯(PP)最早出發,到中環行街之餘,更加玩live同球迷互動。之後PP就返酒店會合馬利安同埋侯斯頓,出去大坑一間地道茶餐廳歎茶,菠蘿包、雞尾包同蛋卷通通唔放過。見到PP一手攞住杯奶茶,一手咬住個蛋撻,笑晒口咁幾咁寫意!馬利安又叫餐廳沖茶畀佢試飲,講明「走奶」,又話要自己親手沖番杯添。

3位球星食飽飽,晏晝就開始「半日遊」,先上太平山頂睇風景,面對住維港呢個世界級靚景,就連皮雅斯都忍唔住要影番幅相,而侯斯頓仲帶埋「私伙相機」做「龍友」。臨走時皮雅斯更獲外籍靚女主動搭訕,PP仲攞埋對方卡片添,唔知會唔有下文呢?

之後「星級旅行團」就去到淺水灣,又到隔離一間寺廟到參觀,PP對天后同觀音像都好有興趣,亦入鄉隨俗,嘗試將銀仔掟入石像個口度祈福。不過身為NBA射手嘅皮雅斯竟老貓燒鬚,掟極都掟唔入,相反馬利安同侯斯頓試了幾次就成功,個個都玩到勁開心。

同小球員見面教波 KG笑番晒
其實7位傳奇球星今次來港,主要係受香港星籃球精英訓練中心邀請,同一班小球員見面。眾星「半日遊」後,喺尋日傍晚齊集灣仔修頓室內場,親身落場指導小球員。之前喺機場cool爆嘅加納特(KG),面對一班可愛嘅小球員亦有番笑容,烏低身親自教授「插花」技巧。至於皮雅斯就最識「搶鏡」,即場表演入樽,令在場嘅小球員和家長都拍爛手掌!眾星今晨會轉戰深圳出席活動,結束後即取道香港機場離境,結束「港深」之行。

東網體育同你追實體壇每個精彩時刻!
http://bit.ly/2ecTF2A 


本文來源:http://hk.on.cc/hk/bkn/cnt/sport/20170808/bkn-20170808000443108-0808_00882_001.html

本文固定鏈接: http://www.motocyclebike.com/21842.html
轉載請注明:Daisy 2017-08-08 01:02:10 于 MOCO時尚資訊 發表

上一篇: :下一篇
返回頂部